विराटचोकः मतदाता भेटघाटको क्रममा सुन्दरहरैंचा नगरपालिकाको वडा नम्बर ७ मा आइपुग्दा बुबाको देहावसानको खबर पाएपछि घर फर्किनुभएका नेकपा एमालेका नेता एवं मोरङ क्षेत्र नम्बर ६ का प्रतिनिधिसभा सदस्य उम्मेद्वार विनोद ढकालले कोराबाटै मत माग्दै आफ्नो मन मतदातासँगै रहेको बताउनुभएको छ ।
माघ २९ गते निर्वाचनको प्रचारप्रसारकै क्रममा उम्मेद्वार ढकाल रहनुहुँदा उहाँको घरमा रहनुभएका १०२ वर्षीय बुबा विष्णुप्रसाद ढकालको निधन भएको थियो ।
बुबाको शोकमा रहेको तेस्रो दिनमा हिजो उम्मेद्वार ढकालले भिडियो सन्देश जारी गर्दै आफू मतदाताकै बीचमा रहेको र मतदातासँग आउन नपाए पनि नेकपा एमालेका कार्यकर्ताहरु घरदैलोमा आइपुग्ने बताउनुभएको हो । ‘म मतदाता बीचमै छु, र मन मतदातासँगै छ,’ उहाँले भन्नुभयो, ‘अहिलेको परिस्थितिपछि म तपाईँहरू बीचमा आएर सुझावहरु लिने नै छु ।’
नेता ढकालले आफूले ६ नम्बर क्षेत्रका समस्याहरू बुझेको र ती सबै समस्यालाई समाधान गर्नेतर्फ क्रियाशील रहने बताउनुभएको छ ।
