धरानः नेपाल युवा उद्यमी मञ्च (एनवाइइ) सुनसरी च्याप्टरले फेब्रुअरी २८ अर्थात् फागुन १६ गते धरान गल्फ क्लब धरानमा एनवाइईएफ गल्फ टुर्नामेन्ट आयोजना गर्ने भएको छ ।
राष्ट्रियस्तरको सो प्रतियोगितामा नेपालका विभिन्न शहरहरूबाट आउने उत्कृष्ट गल्फ खेलाडीहरूका साथै भारतबाट समेत सहभागी खेलाडीहरूको उपस्थिति रहने अपेक्षा गरिएको छ ।
सो प्रतियोगिताले खेलभावना, सौहार्दता तथा व्यावसायिक नेटवर्किङलाई एकै मञ्चमा जोड्दै खेलकुद र उद्यमशीलताको समन्वय गर्ने लक्ष्य लिएको छ । उद्यमी, व्यवसायी, पेशाकर्मी तथा गल्फप्रेमीहरूबीच सहकार्य र सम्बन्ध विस्तार गर्ने उत्कृष्ट अवसरका रूपमा कार्यक्रमलाई लिइएको बताइएको छ ।
पूर्वी नेपालमा गल्फ खेलको प्रवद्र्धन गर्ने तथा धरानका जुनियर गल्फ खेलाडीहरूको विकास र आर्थिक सहयोग गर्न प्रतियोगिता सफल हुने विश्वास आयोजकले लिएको छ । उद्यमी तथा व्यवसायीहरूबीच उच्चस्तरीय नेटवर्किङ अवसर सिर्जना गर्नु र नेतृत्व विकास ताथ सहकार्यको वातावरण सुदृढ पार्नु पनि प्रतियोगिताको उद्देश्य रहेको आयोजकले जनाएको छ ।
प्रतियोगिताबाट सङ्कलित सहयोगको एक अंश धरानका प्रतिभाशाली जुनियर गल्फ खेलाडीहरूको तालिम, उपकरण तथा अन्य आवश्यक स्रोतसाधनका लागि खर्च गरिने भएको छ । यसले स्थानीय युवा खेलाडीहरूलाई राष्ट्रिय तथा अन्तर्राष्ट्रिय स्तरमा प्रतिस्पर्धा गर्न सक्षम बनाउने विश्वास गरिएको छ ।
प्रतियोगिताले धरानलाई उच्चस्तरीय खेलकुद तथा व्यावसायिक नेटवर्किङ कार्यक्रमको केन्द्रका रूपमा स्थापित गर्न महत्वपूर्ण योगदान पुर्याउने विश्वास लिइएको आयोजकले जनाएको छ ।
