विराटचोकः आज नेपाली शेयर बजारको सूचक मापक नेपाल स्टक एक्सचेञ्च (नेप्से) परिसूचक ०.९६ प्रतिशत अर्थात् २६.०५ अंकले घटेर २ हजार ६७२.३९ अङ्कमा अडिएको छ । बजार घटे पनि ४२ कम्पनीको मूल्य बढेको छ । खानीखोला हाइड्रोपावरको शेयर मूल्य १० प्रतिशत बढ्दा रिडी हाइड्रोपावरको शेयरमूल्य ९ दशमलव ११ प्रतिशत बढेको छ ।
नेप्सेमा सूचीकृतमध्ये ३२४ कम्पनीको २ करोड ६७ लाख ६६ हजार ३४७ कित्ता शेयर १ लाख २ हजार २८१ पटक किनबेच हुँदा १० अर्ब ७७ करोड ३९ लाख १५ हजार २८९ रुपैयाँको शेयर किनबेच भएको छ ।
व्यापार समूह मात्रै ०.२२ प्रतिशतले बढेको बजारमा फाइनान्स समूह आज सर्वाधिक अर्थात् २.२९ प्रतिशतले घटेको छ ।
घटेको बजारमा ९ प्रतिशतभन्दा बढी मूल्य बढेको रिडी पावरको आज सर्वाधिक अर्थात् ७७ करोड १९ लाख १८ हजार ६८५ रुपैयाँको शेयर किनबेच भएको छ । एसवाई प्यानल नेपाल, आँखुखोला जलविद्युत्, लिबर्टी इनर्जी र ङादी ग्रुप पावर उच्च मूल्य बढ्ने अन्य कम्पनीमा परेका छन् ।
आज मायाखोला हाईड्रोको शेयरमूल्य सर्वाधिक अर्थात् ५.४० प्रतिशतले घटेको छ । यस्तै माबिलुङ इनर्जीको शेयरमूल्य ४.९३ प्रतिशत, कालिञ्चोक दर्शनको ४.६८ र नेपाल माइक्रो इन्स्योरेन्सको शेयरमूल्य ४.५० प्रतिशतले घटेको छ ।
बजार घटेसँगै समग्र बजार पूँजीकरण ४४ खर्ब ८७ अर्ब १ करोड ४५ लाख ३ हजार ९७० रुपैयाँ कायम भएको छ ।
