विराटचोकः शनिबारदेखि आइसीसी पुरुष टी २० विश्वकप क्रिकेट प्रतियोगिता शुरु भएको छ । नेपाली टिमबाट १५ जना खेलाडी सहभागी भएका छन् । प्रतियोगितामा नेपालले हिजो पहिलो खेल खेल्दा हार बेहोरेको छ । नेपालले अब तीन खेल खेल्न बाँकी छ ।
यस्ता छन् नेपाली क्रिकेट टिमका १५ खेलाडीका विशेषताः
कुशल भुर्तेल (ओपनिङ ब्याटर)
कुशल भुर्तेल नेपाली क्रिकेट टोलीका आक्रामक ओपनिङ ब्याटर हुन् । पावर हिटिङ, छिटो स्कोर बनाउने र इनिङ्सलाई आक्रामक रूपमा शुरु गर्ने क्षमता पनि भुर्तेलमा छ ।
भुर्तेलले फिल्डिङ र बलिङमा पनि योगदान दिन सक्ने हुनाले नेपाली टोलीलाई थप बलियो बनाउने नेपाली क्रिकेटप्रेमीको आशा छ ।
आसिफ शेख (विकेटकिपर ब्याटर)
आसिफ शेख ओपनिङ ब्याटर तथा विकेटकिपर दुवै भूमिकामा उत्कृष्ट छन् । इनिङ्सको सुरुवातमा स्थिरता दिने, राम्रो टेक्निक र दबाबमा पनि राम्रो खेल्ने क्षमता उनमा छ ।
विकेट किपिङमा उनी नेपाली टोलीको पहिलो रोजाइ हुन् । आसिफले भारतमा यसपटक विश्वकप खेलेसँगै आफ्नो दोस्रो टी–२० विश्वकप को अनुभव लिनेछन् ।
रोहितकुमार पौडेल (टपअर्डर ब्याटर)
रोहित पौडेल धैर्यपूर्वक ब्याटिङ गर्ने खेलाडी हुन्।
२० वर्षको उमेरदेखि कप्तानी सम्हाल्दै आएका उनी अहिले अनुभवी भइसकेका छन् । उनी नेपाली क्रिकेटको मुख्य आधारस्तम्भ र नेतृत्वकर्ता हुन् ।
तोस्रो नम्बरमा ब्याटिङ गर्ने रोहितमा इनिङ्सलाई एकरुपता दिने र दबाबमा पनि राम्रो प्रदर्शन गर्ने क्षमता छ । टी–२० विश्वकप २०२६ मा उनले नेपाली टोलीका लागि महत्वपूर्ण भूमिका खेल्ने अपेक्षा गरिएको छ ।
सन्दीप जोरा (ब्याटर)
सन्दीप जोरा मध्यक्रमका ब्याटर हुन् । आक्रामक शैलीमा खेल्ने, छिटो रन बनाउने र दबाबपूर्ण अवस्थामा पनि इनिङ्सलाई अगाडि बढाउने क्षमता उनको मुख्य क्षमता हो । विभिन्न घरेलु तथा अन्तर्राष्ट्रिय खेलहरूमा उनले राम्रो प्रदर्शन गरेका छन् ।
लोकेश बम (ब्याटर)
लोकेश विस्फोटक ब्याटर हुन्, उनी छोटो समयमा ठूलो स्कोर बनाउन सक्छन् । आक्रामक शैली र पावर हिटिङ उनको मुख्य क्षमता हो । २०१८ मा १७ वर्षको उमेरमा उनले पोखरा प्रिमियर लिगमा तीन देशका पूर्वकप्तानको टोलीविरुद्ध अर्धशतक प्रहार गरेर ठूलो ध्यान खिचेका थिए । यो प्रदर्शनले उनलाई राष्ट्रियस्तरमा चर्चित बनाएको थियो ।
दीपेन्द्रसिंह ऐरी (अलराउन्डर)
दीपेन्द्र छिटा र फुर्तिला अलराउन्डर हुन् । फिल्डिङमा अत्यन्त छिटो र प्रभावकारी, बलिङमा विविधता र ब्याटिङमा आक्रामक तथा स्थिर दुवै प्रदर्शन गर्न सक्ने उनको क्षमता छ । उनको गति, ऊर्जा र आक्रामक शैलीका कारण ‘टाइगर’ उपनामले चिनिन्छन् । विपक्षीका लागि डरलाग्दो र टिमका लागि बहुमूल्य खेलाडी दीपेन्द्र नेपाली क्रिकेटका सबैभन्दा पूर्ण अलराउन्डर मध्ये एक हुन् ।
गुल्सन झा (अलराउन्डर)
गुल्सन झा नेपाली टोलीका प्रतिभाशाली युवा अलराउन्डर हुन् जसले बलिङ र ब्याटिङ दुवैमा विपक्षीलाई दबाब दिन सक्छन् । विशेषगरी उनको आक्रामक शैली र परिस्थिति अनुसार खेल्ने क्षमताले विपक्षी खेलाडीलाई तनाव दिन्छ ।
नेपाली क्रिकेटमा युवा तथा उदीयमान अलराउन्डर उनले विभिन्न टी–२० र एकदिवसीय खेलमा नेपालका लागि महत्वपूर्ण योगदान दिएका छन् । विशेषगरी दबाबपूर्ण अवस्थामा इनिङ्स बचाउने वा आक्रमण गर्ने क्षमता उनमा छ ।
आरिफ शेख (ब्याटर)
आरिफ शेख नेपाली टोलीको ब्याटिङका आधारस्तम्भ हुन् । आरिफ मिडल अर्डरमा स्थिरता र विश्वसनीयता दिने प्रमुख ब्याटर हुन् । दबाबपूर्ण अवस्थामा पनि राम्रो खेल्ने, इनिङ्सलाई लम्ब्याउने र टिमलाई बलियो स्थिति दिन सक्ने क्षमता उनमा छ । आरिफ नेपाली क्रिकेटका युवा तथा अनुभवी पुस्ताका बीचमा पुल बन्ने खेलाडी हुन् । उनले एकदिवसीय र टी–२० मा नेपालका महत्वपूर्ण इनिङ्स खेलेका छन् र नेपालको ब्याटिङ लाइनअपलाई मजबुत बनाएका छन् ।
बसिर अहमद (अलराउन्डर)
बसिर अहमद बलिङ र ब्याटिङ दुवैमा एकरुपको प्रदर्शन गर्न सक्ने बायाँ हाते खेलाडी हुन् । बलिङमा नियन्त्रण र विकेट लिने क्षमता तथा ब्याटिङमा दबाबमा पनि राम्रो स्कोर बनाउने क्षमता उनको मुख्य विशेषता हो ।
उनी टिमको मिडल अर्डरमा ब्याटिङ गर्न सक्छन् ।
सोमपाल कामी (बलिङ अलराउन्डर)
सोमपाल नयाँ बलले विपक्षी ब्याटरहरूलाई सिकार बनाउने क्षमता भएका अनुभवी खेलाडी हुन् । करियरको सुरुवात ब्याटरको रूपमा गरेका उनी पछि तीव्र गतिका बलर बने र हाल अलराउन्डरको भूमिकामा छन् । उनी नेपाली टोलीबाट सबैभन्दा बढी तीन पटक टी–२० विश्वकप खेल्ने एक्ला खेलाडी हुन् ।
करण केसी (बलिङ अलराउन्डर)
करण केसी हार्न लागेको खेललाई पनि जिताउन सक्ने अलराउन्डर हुन् । बलिङ र ब्याटिङ दुवैमा महत्वपूर्ण योगदान दिन सक्ने खेलाडी हुन् ।
सन्दीप लामिछाने (लेग स्पिनर)
नेपाल क्रिकेट टोलीका प्रमुख लेगस्पिनर सन्दीप लामिछाने नेपाली बलिङ विभागको मुख्य भरोसा हुन् । उनी नेपाली बलिङका सबैभन्दा ठूलो र भरपर्दो हतियार हुन् । लेगस्पिनरको रूपमा उनको गुणस्तर र प्रभावले नेपाली क्रिकेटलाई अन्तर्राष्ट्रिय स्तरमा चिनाएको छ । उनी नेपाली क्रिकेट इतिहासका सबैभन्दा सफल स्पिनरमध्ये एक हुन् ।
ललित राजवंशी (बायाँ हाते स्पिनर)
बायाँ हाते स्पिनर ललित राजवंशी किफायती बलर हुन् । उनको क्षमता कम रन दिने र विकेट लिने हो । उनले आफ्नो बलिङलाई समयसँगै सुधार्दै लगेका छन् । ललित खेल नियन्त्रणमा राख्न सक्ने स्पिनर हुन् ।
नन्दन यादव (बलर)
मध्यम गतिका बलर नन्दनकुमार यादव सुझबुझपूर्ण र बुद्धिमानीपूर्ण बलिङका लागि चिनिन्छन् । नन्दन दशक लामो क्रिकेट करियरपछि उनी झन्डै अस्ट्रेलिया पलायन भएका थिए । अस्ट्रेलियामा क्रिकेट खेलेपछि उनको बलिङमा धेरै परिष्कृत र सुधार आएको थियो । रणनीति र परिस्थिति अनुसारको बलिङ उनको मुख्य विशेषता हो ।
शेर मल्ल (स्पिनर)
शेर मल्ल एनपिएलमा लगातार दुई उपाधि जित्ने एक मात्र खेलाडी हुन् । पहिलो सिजनमा जनकपुर बोल्ट्सबाट र दोस्रो सिजनमा लुम्बिनीबाट उपाधि जितेका उनी दोस्रो सिजनमा ’मिस्ट्री’ स्पिनरको उपनामले चर्चित बने । पावरप्लेमा विकेट लिने र दबाबमा ठूला सट खेल्ने क्षमता उनमा छ । उनी विश्वकपका लागि परेका एक मात्र नयाँ खेलाडी हुन् ।
