विराटचोकः फागुन २१ गते हुने प्रतिनिधिसभा सदस्यको लागि प्रत्यक्षतर्फ १६५ निर्वाचन क्षेत्रमा मतदान हुँदैछ । प्रत्यक्षतर्फको निर्वाचनमा राजनीतिक दल र स्वतन्त्रसमेत गरी ३ हजार ४०६ जना उम्मेद्वार प्रतिस्पर्धामा छन् । जसमध्ये ३ हजार १७ जना पुरुष, ३८८ जना महिला र अन्य समूहका एक जना उम्मेदवार छन् ।
त्यसो त १६५ वटा निर्वाचन क्षेत्रमध्ये ३१ वटा निर्वाचन क्षेत्रमा त महिला उम्मेद्वार नै छैनन् । तथ्यांकअनुसार कोशी प्रदेश अन्तर्गतका ९ वटा निर्वाचन क्षेत्रमा महिला उम्मेद्वारी शून्य छ । ताप्लेजुङ, पाँचथर, भोजपुर, धनकुटा, मोरङ–२, मोरङ–३, खोटाङ, उदयपुर–१ र उदयपुर–२ मा महिला उम्मेद्वार छैनन् ।
कोशी प्रदेशमा पुरुष उम्मेदवार ४३६ जनाको र महिला उम्मेदवार ५८ जनाको रहेको छ ।
मधेश प्रदेशअन्तर्गत महिला उम्मेदवार शून्य रहेको एउटा मात्रै निर्वाचन हो रौतहट–२ । त्यहाँ २६ जना उम्मेदवार छन् । यसमध्ये १४ जना दलीय र १२ जना स्वतन्त्र उम्मेदवार छन् । सबै पुरुष उम्मेददवार हुन् ।
मधेश प्रदेशमा महिला उम्मेदवारको संख्या १०९ छ । पुरुष उम्मेदवार ९१८ जना छन् ।
बागमती प्रदेशमा काभ्रे–१, सिन्धुली–१ र नुवाकोट–२ मा महिला उम्मेद्वार छैनन् ।
बागमती प्रदेशमा महिला उम्मेदवारको संख्या १०८ छ । पुरुष उम्मेद्वार ६२३ जना छन् ।
गण्डकी प्रदेशअन्तर्गत तीन वटा निर्वाचन क्षेत्रमा महिला उम्मेद्वारी शून्य छ । पुरुष मात्रै उम्मेदवार रहेका क्षेत्रहरूमा स्याङ्जा–१, स्याङ्जा–२, म्याग्दी रहेका छन् ।
गण्डकी प्रदेशमा पुरुष उम्मेदवार २०३ जना र महिला उम्मेदवार ३१ जना छन् ।
लुम्बिनी प्रदेश अन्तर्गतका कपिलवस्तु–३, रोल्पा, दाङ–१ र बाँके –२ मा महिला उम्मेदवारी शून्य छ ।
लुम्बिनी प्रदेशमा ५८२ जना उम्मेदवार छन् । त्यसमध्ये महिला उम्मेदवारको संख्या ५३ र पुरुष उम्मेदवारको संख्या ५२९ जना छ ।
कर्णाली प्रदेशका चार वटा निर्वाचन क्षेत्रमा महिला उम्मेदवार छैनन् । मुगु, कालीकोट, जाजरकोट र सुर्खेत १ मा पुरुष उम्मेद्वारहरू मात्रै प्रतिस्पर्धामा रहेका छन् ।
कर्णाली प्रदेशमा १३१ उम्मेदवार छन् । त्यसमध्ये महिला उम्मेदवार ११ जना र पुरुष उम्मेदवार १२० जना छन् ।
सुदूर पश्चिमका बाजुरा, अछाम–१, अछाम–२, बझाङ, दार्चुला, बैतडी र डडेलधुरामा महिला उम्मेद्वार छैनन् ।
सुदूर पश्चिम प्रदेशमा २०६ उम्मेद्वार हुँदा महिला उम्मेदवार १८ जना र पुरुष उम्मेद्वार १८८ जना छन् ।
देशभरमा महिला उम्मेद्वारको उपस्थिति ११ दशमलव ३९ प्रतिशत मात्रै छ ।
