काठमाडौंः फागुन २१ गते हुने प्रतिनिधिसभा सदस्य निर्वाचनमा समानुपातिकतर्फको बन्दसूचीमा २५ देखि ८० वर्षभन्दा माथिका उमेरका उम्मेद्वार पनि समावेश भएका छन् ।
निर्वाचन आयोगको बन्दसूचीमा समाविष्ट विवरणअनुसार युवामा महिला उम्मेद्वार र प्रौढमा तुलनात्मक रूपमा पुरुष उम्मेद्वार बढी रहेको देखिएको छ । आयोगका अनुसार बन्दसूचीमा ३ हजार १३५ उम्मेद्वार रहेकामा महिला १ हजार ७७२ र पुरुष एक हजार ३६३ जना छन् ।
आयोगका अनुसार सो बन्दसूचीमा २५ देखि २९ वर्ष उमेर समूहका महिला ११७ र पुरुष ५१ गरी १६८ जना, ३० देखि ४० उमेर समूहका २०१ महिला र ८४ पुरुष गरी २८५ जना उम्मेद्वार छन् । ३५ देखि ३९ उमेर समूहका २६८ महिला र १३३ पुरुष गरी ४०१ जना, ४० देखि ४४ उमेर समूहका ३४१ महिला र १९४ पुरुष गरी ५३५ जना उम्मेदवार छन् ।
४५ देखि ४९ उमेर समूहका महिला २९४ र पुरुष १६२ गरी ४५६ जना, ५० देखि ५४ उमेर समूहका २२० महिला र १६६ पुरुष गरी ३८६ जना, ५५ देखि ५९ उमेर समूहका १५५ महिला र २०० पुरुष गरी ३५५ जना र ६० देखि ६४ उमेर समूहका १०३ महिला र १५८ पुरुष गरी २६१ जना उम्मेद्वार रहेका छन् ।
त्यस्तै, ६५ देखि ६९ उमेर समूहका ४४ महिला र ११४ पुरुष गरी १५८ जना, ७० देखि ७४ उमेर समूहका १९ महिला र ६७ पुरुष गरी ८६ जना, ७५ देखि ७९ उमेर समूहका महिला ९ र पुरुष २३ गरी ३२ जना तथा ८० वर्ष माथिका १ महिला र ११ पुरुष गरी १२ उम्मेद्वार बन्दसूचीमा रहेका छन् ।
समावेशी समूहका आधारमा आदिवासी जनजातितर्फ ९११ जना, खसआर्यतर्फ ९४६ जना, दलितर्फ ४२५ जना, थारुतर्फ २०३ जना, मधेसीतर्फ ५०२ जना, मुस्लिमतर्फ १४८ जना उम्मेदवार समावेश छन् ।
आयोगमा गत पुस १३ र १४ गते ६४ राजनीतिक दलले बन्दसूची पेस गरेका थिए । तीमध्ये २२ दलले मात्रै ११० वटै स्थानमा उम्मेद्वारी मनोनयन गरेका थिए ।
प्रतिनिधिसभा सदस्य निर्वाचनको समानुपातिक निर्वाचन प्रणालीतर्फको निर्वाचन अधिकृतको कार्यालयमा राजनीतिक दलहरूबाट पेस भएका उम्मेद्वारको बन्दसूचीमाथि परेका उजुरीका आधारमा आयोगले ७६ जना उम्मेद्वारको नाम बन्दसूचीबाट हटाउने निर्णय गरेको थियो ।
