विराटचोकः मोरङको सुन्दरहरैंचास्थित नेपालीरिका होटलमा हिजो भएको नेपाल–भारत सीमा सुरक्षा बैठकका क्रममा बेहोश भएर ढलेका सशस्त्र प्रहरी बलका उपरीक्षक (एसपी) राजेश घिमिरेको निधन भएको छ ।
सशस्त्र प्रहरी बल नेपाल र भारतीय सीमा सुरक्षा बल (एसएसबी)का अधिकारी सम्मिलित डीआईजी तहको समकक्ष समन्वय बैठक चलिरहेका बेला उहाँ बेहोश भएर ढल्नुभएको थियो ।
उपचारका क्रममा हिजो राति ८ बजेर ५२ मिनेटमा विराट मेडिकल कलेजमा उहाँको निधन भएको हो ।
उच्च रक्तचापका बिरामी उहाँ बैठकका क्रममा ढल्दा जिब्रो काटिएको थियो । उहाँको स्वास्थ्य अवस्था थप जटिल बनेपछि भेन्टिलेटरमा राखेर उपचार गरिएको थियो ।
उहाँ सशस्त्र प्रहरी बल नम्बर १ बराह बाहिनी पकलीमा कार्यरत हुनुहुन्थ्यो ।
