विराटचोकः नेपाल ज्योतिष परिषद् मोरङ जिल्ला समितिको छैटौँ साधारणसभा तथा तेस्रो अधिवेशन सुन्दरहरैंचाको विराटचोकमा सम्पन्न भएको छ ।
सुन्दरहरैँचा नगरपालिका वडा नं. ९ स्थित कालिमन्दिर परिसरमा हिजो सम्पन्न साधारणसभालाई परिषद्का केन्द्रीय महासचिव विश्वप्रकाश लामिछाने, कोशी प्रदेश अध्यक्ष बाबुराम निरौलालगायतले सम्बोधन गर्नुभएको थियो ।
सम्बोधनका क्रममा उहाँहरुले ज्यातिषीय फलादेशमा एकरूपता ल्याउन र ज्योतिषीहरुको आधिकारिकताका लागि अनुमतिपत्र (लाइसेन्स) को व्यवस्था गरिने बताउनुभयो ।
ज्योतिष क्षेत्रलाई मर्यादित, वैज्ञानिक र व्यवस्थित बनाउन परिषद् निरन्तर क्रियाशील रहने उहाँहरुको भनाइ थियो ।
साधारणसभामा परिषद्को केन्द्र, प्रदेश समिति र छिमेकी जिल्ला अध्यक्षका साथै विश्व ज्योतिष परिषद्का प्रतिनिधिको उपस्थिति रहेको थियो ।
कार्यक्रममा ज्योतिष क्षेत्रका विशिष्ट व्यक्तित्व विष्णुप्रसाद न्यौपाने, सामाजिक व्यक्तित्व गोपालबहादुर थापा तथा कालीमाता भजन कीर्तन साधना समूहलाई सम्मान गरिएको थियो ।
साधारणसभाले परिषद्का मोरङ अध्यक्ष राजेन्द्रप्रसाद ढकालले प्रस्तुत गर्नुभएको प्रतिवेदन पारित गरेको थियो । परिषद्का मोरङ अध्यक्ष ढकालको अध्यक्षतामा भएको कार्यक्रमको सञ्चालन सहसचिव यादवप्रसाद घिमिरेले गर्नुभएको थियो । कार्यक्रममा परिषद्का मोरङ उपाध्यक्ष सोम भट्टराईले स्वागत मन्तव्य राख्नुभएको थियो ।
