विराटचोकः सामाजिक उत्तरदायित्वअन्तर्गत ज्योति विकास बैंकले कोशी प्रदेशका विभिन्न दुर्गम जिल्लाका स्वास्थ्य चौकीहरूलाई नवजात शिशुको जीवन रक्षाका लागि उपयोगी ‘बेबी वार्मर’ मेसिन हस्तान्तरण गरेको छ ।
नवजात शिशुको शारीरिक तापक्रम उचित राख्न र हाइपोथर्मियाबाट जोगाउन बैंकले संखुवासभाको सिसुवाखोला हेल्थ पोस्ट र नुम प्राथमिक स्वास्थ्य केन्द्र, खोटाङको पुजन सेवा नगर अस्पताल तथा पाँचथरको एकतीन हेल्थ पोस्टमा उक्त उपकरण प्रदान गरेको हो ।
आफ्नो शाखा नभएका स्थानमा समेत पुगेर यी उपकरण उपलब्ध गराउँदै सुरक्षित प्रसूति सेवामा पहुँच सुनिश्चित गर्ने लक्ष्य राखेको बैंकले जनाएको छ । उपकरण हस्तान्तरणसँगै बैंकले सम्बन्धित स्वास्थ्यकर्मीहरूलाई मेसिन सञ्चालनसम्बन्धी विशेष तालिम समेत प्रदान गरेको थियो । ज्योति विकास बैंकले हालसम्म देशभर ७० वटा बेबी वार्मर जडान गरिसकेको जनाएको छ ।
बैंकले आफ्नो मुनाफाबाट अन्य बैंकको तुलनामा ५० प्रतिशत बढी रकम सामाजिक उत्तरदायित्व शीर्षकमा छुट्याउँदै आएको बैंकले जनाएको छ ।
