विराटचोकः साना किसान कृषि सहकारी संस्था लिमिटेड मृगौलिया सुन्दरहरैंचा–११ को २७ औँ वार्षिक साधारणसभामा विभिन्न क्षेत्रका व्यक्तिलाई सम्मान गरिएको छ ।
पुस २० गते संस्थाको प्राङ्गणमा भएको कार्यक्रममा संस्थाका ज्येष्ठ शेयर सदस्य, नियमित बचतकर्ता, पशुपालक, बीउ उत्पादक, कक्षा १२ को परीक्षामा सर्वाेत्कृष्ट अङ्क ल्याउने शेयर सदस्यका छोराछोरी, नियमित बाल बचतकर्ता र संस्थाका कर्मचारीलाई पुरस्कृत गरिएको हो ।
संस्थाले ज्येष्ठ महिला शेयर सदस्य पार्वती भण्डारी र ज्येष्ठ पुरुष शेयर सदस्य काजीराम बस्नेतलाई प्रमाणपत्र, दोसल्ला र नगदद्वारा सम्मान गरेको छ ।
त्यस्तै, नियमित बचततर्फ पदमबहादुर दाहाल र बीउ उत्पादक समूहतर्फ पञ्चमुखी बीउ उत्पादन समूहलाई सम्मान गरिएको छ ।
गाईभैंसीपालनतर्फ किसान लक्ष्मी शर्मा, बंगुरपालक किसान बालाकुमारी लिम्बू, कुखुरापालनतर्फ सबिनादेवी सिक्दार र तरकारी खेतीतर्फ हीरा उरावलाई सम्मान गरिएको थियो । उत्कृष्ट किसानलाई दोसल्ला, नगद र प्रमाणपत्रका साथमा विभिन्न कृषि औजार प्रदान गरिएको थियो ।
शिक्षातर्फको पुरस्कार अन्तर्गत गत वर्षको कक्षा १२ को वार्षिक परीक्षामा उत्कृष्ट अङ्क ल्याउने शेयर सदस्यका सन्तानलाई पुरस्कृत गरिएको थियो । जसअन्तर्गत शेयर सदस्य दीपा ओझाकी छोरी दीक्षा ओझा र बिना सिलवालका छोरा दिव्य पोखरेललाई नगद तथा प्रमाणपत्र प्रदान गरिएको थियो ।
त्यस्तै, नियमित बाल बचततर्फ मालादेवी तामाङकी छोरी साहिरा तामाङलाई नगद पुरस्कारका साथमा प्रमाणपत्र प्रदान गरिएको थियो ।
कर्मचारीसम्मानअन्तर्गत संस्थाको स्थापनाकालदेखि निरन्तर कार्यरत संस्थाका प्रबन्धक अर्थलाल भगतलाई सम्मान गरिएको थियो ।
संस्था सञ्चालक समिति अध्यक्ष हरिबहादुर बस्नेतको अध्यक्षता तथा संस्थाका पूर्व अध्यक्ष महेन्द्र खनालको प्रमुख आतिथ्यतामा भएको कार्यक्रममा जिल्ला कृषि सहकारी संघ मोरङका अध्यक्ष रवीन्द्र आचार्यलगायतको उपस्थिति रहेको थियो ।
