विराटचोकः मंसिरमा महिनामा शेयर खरिद बिक्रीको काम गरेर कमिसनबापत मात्रै ब्रोकर कम्पनीहरूले ४३ करोड ४७ लाख रुपैयाँ नाफा गरेका छन् । नेपाल स्टक एक्सचेन्ज (नेप्से)ले प्रकाशित गरेको मंसिर महिनाको मासिक विवरण अनुसार उक्त रकम नेप्सेलाई तिर्नुपर्ने कमिसन र कर दुवै कट्टा गरिसकेपछिको रकम हो ।
कात्तिकको तुलनामा मंसिरमा ब्रोकरले गर्ने आम्दानी बढेको छ । नेप्सेले प्रकाशित गरेको मासिक विवरण अनुसार कात्तिकमा ९२ ब्रोकर कम्पनीहरूले ३२ करोड ७७ लाख १५ हजार २९८ रुपैयाँ ९० पैसा मात्रै कमाएका थिए ।
सबैभन्दा धेरै कमाउने कम्पनीमा नासा सेक्युरिटीज परेको छ । उसले एक महिनामा ३ करोड ५ लाख रुपैयाँ कमाएको छ । कात्तिक महिनामा पनि सबैभन्दा धेरै कमाउने ब्रोकर कम्पनी नासा नै रहेको थियो । दोस्रोमा सबैभन्दा धेरै कमाउने ब्रोकर कम्पनीमा भिजन सेक्युरिटीज छ । उसले १ करोड ५५ लाख रुपैयाँ आम्दानी गरेको छ । गत कात्तिकमा पनि भिजन दोस्रो स्थानमा नै रहेको थियो ।
सबैभन्दा धेरै कमाउने १० कम्पनीको सूचीबाट यस पटक श्रीहरि सेक्युरिटीज बाहिरिएको छ । श्रीहरि यस पटक १७ औँ स्थानमा झरेको छ । सबैभन्दा धेरै कमाउने २० कम्पनीहरूको सूचीमा एउटाबाहेक सबै पुराना ब्रोकर कम्पनी छन् । नयाँ कम्पनी मध्ये क्यापिटल म्याक्सले मात्रै सबैभन्दा धेरै कमाउने १० कम्पनीको सूचीमा आफ्नो स्थान सुरक्षित गरेको छ । उसले १ करोड २ लाख रुपैयाँ कमाउँदै ९ औँ स्थान ओगटेको छ । यसअघि कात्तिकमा कम्पनी १० औँ स्थानमा थियो ।
कमाइका हिसाबले बैंकका सहायक कम्पनीहरू सबैभन्दा धेरै कमाउने ब्रोकर कम्पनीहरूको सूचीमा पुछारतिर परेका छन् ।
स्टक डिलरको रुपमा आएका नागरिक स्टक डिलर र नबिल स्टक डिलरमध्ये कमाइका हिसाबले नागरिक स्टक डिलर निकै अघि देखिएको छ । नागरिक स्टक डिलर सबैभन्दा बढी कमाउनेको सूचीमा २२ औँ नम्बरमा छ । गत कात्तिकमा २४ औँ स्थानमा थियो । नबिल स्टक डिलर ५४ औँ स्थानमा झरेको छ । गत कात्तिकमा नबिल ४४ औँ नम्बरमा थियो ।
ब्रोकर कम्पनीको मध्यस्थकर्ता बिना सर्वसाधारण लगानीकर्ताले दोस्रो बजारमा शेयर किन्न र बेच्न पाउँदैनन् । अनलाइनमार्फत् शेयर किनबेचको सुविधा गर्दा मध्यस्थकर्ताको आवश्यकता नपरे पनि लगानीकर्ताले ब्रोकरलाई कमिसन तिर्नैपर्ने बाध्यता रहेको छ ।
