विराटनगरः मंसिर २७ गतेदेखि २९ गतेसम्म हुने नेकपा एमालेको ११ औँ महाधिवेशनका लागि कोशी प्रदेशको सोलुखुम्बु जिल्लामा मात्रै सर्वसम्मत प्रतिनिधि चयन भएका छन् । बाँकी जिल्लामा प्रतिनिधि चयनका लागि भोलि मतदान हुने भएको छ ।
सोलुखुम्बुबाट बुद्धिकुमार राजभण्डारी, डुफकुमार बास्तोल, डि. बि. रानापाल, कल्पना राई, मोहनकुमारी कार्की र जगनाथ बास्तोला प्रतिनिधिमा सर्वसम्मत चयन भएका छन् ।
अधिवेशनका लागि भूगोलबाट २२९ जना, जिफन्ट (ट्रेड युनियन) बाट ७ जना र प्रदेश कमिटीबाट ५ जना गरी करिब २४१ प्रतिनिधि सहभागी हुनेछन् ।
पूर्व राष्ट्रपति विद्यादेवी भण्डारीको गृह जिल्ला मोरङबाट ४६ प्रतिनिधि चयनका लागि १४५ जनाले उम्मेदवारी दर्ता गराएका छन् । मोरङमा २१ खुला, १५ महिला, ३ दलित र ७ युवा प्रतिनिधिका लागि तेब्बरभन्दा बढीले उम्मेद्वारी दिएका हुन् ।
धनकुटामा कोशी प्रदेशसभा सदस्य समेत रहेका एमाले नेता इन्द्रमणि पराजुली र अर्का नेता राजेन्द्र राईको नेतृत्वमा अलग–अलग प्यानल बनेका छन् ।
पूर्व प्रधानमन्त्री तथा पार्टी अध्यक्ष केपी शर्मा ओलीको गृहजिल्ला झापामा पनि प्रतिनिधि चयन हुने आकाङ्क्षी धेरै रहेका छन् ।
शुक्रबार मध्यरातसम्ममा भए पनि धेरैको उम्मेद्वारी फिर्ता गराउन पार्टीका नेताहरु लागेको बताइएको छ ।
