विराटचोकः नेपाल प्रिमियम लिग (एनपीएल) को दोस्रो संस्करणमा काठमान्डु गोर्खाजले दोस्रो जीत हात पार्दै अङ्क जोडेको छ ।
हिजो त्रिवि अन्तर्राष्ट्रिय क्रिकेट मैदानमा भएको खेलमा काठमान्डुले लुम्बिनी लायन्सलाई २२ रनले पराजित गरेको हो । चार खेल खेलिसकेको काठमान्डुले दोस्रो जीतपछि अंक जोडेर तेस्रो स्थानमा पुगेको छ । पहिलो खेलमा जनकपुर बोल्ट्सलाई पराजित गरेपछि काठमान्डु सुदूरपश्चिम रोयल्स र विराटनगर किंग्ससँग लगातार पराजित भएको थियो ।
काठमान्डुले दिएको १५९ रनको लक्ष्य पछ्याएको लुम्बिनीले १९.१ ओभरमा सबै विकेट गुमाएर १३५ रनमै अलआउट भएको थियो । लुम्बिनीका लागि शेर मल्लले सर्वाधिक २७ र दिलीप नाथले २५ रन बनाए पनि पर्याप्त भएन ।
बलिङमा काठमान्डुका मिलिन्द कुमार र जेरार्ड एरासमसले दुई÷दुई तथा कप्तान करण केसी, शाहब आलम, सन्तोष यादव र रासिद खानले समान एकएक विकेट लिएका थिए ।
लुम्बिनीको पनि यो लगातार दोस्रो हार हो । पहिलो खेलमा चितवन राइनोजलाई हराएको लुम्बिनी दोस्रो खेलमा कर्णाली याक्ससँग पराजित भएको थियो ।
