विराटचोकः विश्वभर मनाइने लैङ्गिक हिंसाविरुद्धको १६ दिने अभियानमा यस पटक सुन्दरहरैंचामा अघिल्ला वर्षमा झैँ उत्साह देखिएन । महिला अधिकारकर्मी, जनप्रतिनिधि, राजनीतिक दलका प्रतिनिधिको उपस्थिति यस पटक देखिएन ।
सुन्दरहरैंचा नगरपालिकाको कार्यालयबाट शुरु भएको र्याली विराटचोक दक्षिण बाट उपमेयरमार्ग हुँदै हरैंचा मोडमा निस्किएर पुनः नगरपालिकाको कार्यालयमा आएर टुङ्गिएको थियो । नगरपालिकाको कार्यालयमा उपमेयर अकली चौधरीले सम्बोधन गरेपछि पहिलो दिनको कार्यक्रम सम्पन्न भएको थियो ।
लगभग ३५० जना सहभागी कार्यक्रममा ३०० जनाभन्दा बढी स्कुले विद्यार्थी सहभागी थिए । लगभग १०० जना विद्यार्थी सिद्धार्थ सेकेण्डरी स्कुलबाट सहभागी थिए । द राइजिङ र शिक्षा निकेतन माविका विद्यार्थीको पनि उल्लेख्य सहभागिता थियो । कार्यक्रम सकिएपछि सुकुना माविका विद्यार्थी नगरपालिका परिसरमा पुगेका थिए ।
विद्यार्थी र शिक्षकबाहेक सो र्यालीमा सीमित महिला जनप्रतिनिधि, प्रमुख प्रशासकीय अधिकृत गणेशराज कार्कीलगायतका केही कर्मचारी मात्रै सहभागी थिए ।
र्यालीमा ‘हिंसा होइन अधिकार, सुरक्षित समाज सिङ्गो परिवार’, ‘पीडितलाई साथ दिऔँ, हिंसा अन्त्य गरौँ’, ‘हिंसा लुकाएर होइन उजागर गरेर अन्त्य गरौँ’जस्ता सन्देशसहितका नारा लगाइएको थियो । र्यालीमा सहभागीले पनि तिनै नारा लेखिएका प्लेकार्ड बोकेका थिए ।
‘प्रविधिको सही प्रयोग गरौँ, लैङ्गिक हिंसा अन्त्य गरौँ’ भन्ने मूल नारासहित यो वर्ष अभियान मनाइँदैछ ।
