विराटचोकः बन्दीपुर केवलकार एण्ड टुरिजम लिमिटेडले आजदेखि सर्वसाधारणहरूका लागि ४३ लाख ४१ हजार ८० कित्ता प्राथमिक शेयर (आईपीओ) बिक्री गर्ने भएको छ ।
सो आईपीओमा लगानीकर्ताले न्यूनतम १० कित्ता र अधिकतममा २० हजार कित्ताका लागि आवेदन दिन सक्नेछन् । लगानीकर्ताले नेपाल धितोपत्र बोर्डबाट स्वीकृतिप्राप्त सीआस्बा सदस्य बैंक तथा वित्तीय संस्था र तिनले तोकेका शाखा कार्यालय तथा मेरो शेयर एप वा वेबसाइटबाट आवेदन दिन सक्नेछन् ।
कम्पनीको आईपीओ निष्काशन बन्द छिटोमा भदौ १५ गते र ढिलोमा भदौ २५ गते हुने कम्पनीको आईपीओ निष्कासन तथा बिक्री प्रबन्धक नेपाल एसबीआई मर्चेन्ट बैंकिङ लिमिटेडले जनाएको छ ।
कम्पनीले पहिलो चरणअन्तर्गत गत साउन ६ गतेदेखि आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीका लागि आईपीओ बिक्री गरेर बाँडफाँड भइसकेको छ ।
कम्पनीले कुल ५८ लाख ६० हजार कित्ता सेयर निष्कासनका लागि नेपाल धितोपत्र बोर्डबाट अनुमति पाएको थियो । जसमध्ये जारी पूँजीको २ प्रतिशत अर्थात ५ लाख ६६ हजार ५ सय कित्ता आयोजना प्रभावित क्षेत्र (तनहुँ जिल्लाको बन्दीपुर गाउँपालिकाका सबै वडाहरू, आँबुखैरेनी गाउँपालिकाका सबै वडा, नगरपालिका वडा न. १ तथा गोरखा जिल्लाको पालुङटार नगरपालिका वडा न. ७) का स्थानीय बासिन्दाका लागि र छुट्याएको थियो ।
सर्वसाधारणका लागि छुट्टयाइएको ५२ लाख ९४ हजार कित्ताको १० प्रतिशत अर्थात् ५ लाख २९ हजार ४०० कित्ता शेयर नेपाल सरकारको सम्बन्धित निकायबाट श्रम स्वीकृति प्राप्त गरी वैदेशिक रोजगारीमा रहेका नेपालीहरूका लागि छुट्याइएको थियो ।
