विराटचोकः चालु आर्थिक वर्षको अन्तिम कारोबार दिन आज नेप्से परिसूचक सामान्य अंक बढेर बन्द भएको छ । नेप्से लगातार तेस्रो दिन बढेको हो ।
आज नेप्से परिसूचक ७.५० अंक बढेर २५९७.८० विन्दुमा अडिँदा कारोबार रकम पनि बढेको छ । हिजो ४ अर्ब १७ करोड रुपैयाँको शेयर खरिदबिक्री भएको थियो । आज भने ३७१ स्टकको ३९ हजार ५९५ पटकको कारोबारमा ४ अर्ब ५६ करोड २९ लाख ५० हजार रुपैयाँबराबरको ९४ लाख ६९ हजार कित्ता शेयर किनबेच भएको हो ।
बढेको बजारमा आज एनआईबिएल ग्रोथ फण्डको इकाईमूल्य सर्वाधिक १५ प्रतिशत बढेको छ । फस्र्ट माइक्रोफाइनान्स लघुवित्त वित्तीय संस्थाको शेयरमूल्य साढे १४ प्रतिशतभन्दा बढी बढेको छ । चिरख्वा हाइड्रोपावरको शेयरमूल्य करिब साढे १४ प्रतिशत बढेको छ ।
बढेको बजारमा कर्पोरेट डेभलपमेन्ट बैंकको शेयरमूल्य आज सर्वाधिक ८.७७ प्रतिशत घटेको छ । कारोबार रकमका आधारमा आज सिंगटी हाइड्रो इनर्जीको सर्वाधिक २४ करोड ७४ लाख २९ हजार २९३ रुपैयाँको शेयर कारोबार भएको छ । ८.५ प्रतिशत सानिमा डिबेञ्चर २०८७ र एनआरएन इन्फ्रास्ट्रक्चर एण्ड डेभलपमेन्ट उच्च कारोबार गर्ने अन्य कम्पनीमा परेका छन् ।
आज ९ उपसमूहको परिसूचक बढेको छ भने ४ उपसमूहको परिसूचक घटेको छ । सामुहिक लगानी कोष उपसमूहको परिसूचक सर्वाधिक १.६६ प्रतिशत बढेको छ । लघुवित्त र निर्जीवन बीमा उपसमूहको परिसूचक १ प्रतिशतभन्दा बढी बढेको छ ।
वित्त, होटल तथा पर्यटन, जलविद्युत र उत्पादन तथा प्रशोधन उपसमूहको परिसूचक सामान्य घटेको छ ।
बजार बढेसँगै समग्र बजार पूँजीकरण ४४ खर्ब ६३ अर्ब ५५ करोड ७ लाख ५२ हजार ६६४ रुपैयाँ कायम भएको छ ।
