विराटचोकः आज बिहान भएको अन्तिम क्वार्टर फाइनल खेलमा स्वीट्जरल्याण्डमाथि रोमाञ्चक जीत हात पार्दै साविक विजेता अर्जेन्टिना सन् २०२६ को विश्वकपको सेमीफाइनलमा पुगेको छ ।
१० खेलाडीमा सीमित भएर पनि बहादुरीपूर्वक लडेको स्वीट्जरल्याण्डका लागि यो हार निकै पीडादायी रह्यो । मध्यान्तरपछिको खेलमा स्ट्राइकर ब्रिल एम्बोलोले ‘डाइभिङ’ (फाउल भएको नाटक) गरेको भन्ने भिडियो असिस्टेन्ट रेफ्रीको निर्णयपछि उनलाई दोस्रो पहेँलो कार्ड दिँदै मैदानबाट बाहिर पठाइएको थियो ।
सुरुमा लियान्द्रो पारेडेसले एम्बोलोलाई फाउल गरेको देखिएपछि पारेडेसलाई पहेँलो कार्ड दिइएको थियो । तर, भारले रेफ्रीलाई पुनः जाँच गर्न आग्रह ग¥यो, जहाँ रिप्लेमा स्वीस खेलाडी एम्बोलोले नै लडेको नाटक गरेको स्पष्ट देखियो । फलस्वरूप पारेडेसको कार्ड खारेज गरियो र एम्बोलोलाई रातो कार्ड दिइयो, जसले स्वीस टोलीमा आक्रोश पैदा गरेको थियो ।
एम्बोलोले रातो कार्ड पाउनु ठीक ५ मिनेटअघि मात्र स्वीट्जरल्याण्डले बराबरी गोल गरेको थियो ।
खेलको १० औँ मिनेटमै लियोनेल मेसीको कर्नरमा एलेक्सिस म्याक एलिस्टरले हेडमार्फत गोल गर्दै अर्जेन्टिनालाई सुरुवाती अग्रता दिलाएका थिए । तर, ६७ औँ मिनेटमा स्वीट्जरल्याण्डका डान एनडोएले गोल गर्दै खेललाई १–१ को बराबरीमा ल्याएका थिए ।
अन्तिम समयमा स्वीट्जरल्याण्डले बराबरी गोलका लागि दबाब दिइरहेका बेला काउन्टर अट्याकमा लाउटारो मार्टिनेजले अर्को गोल गरेका थिए ।
यो जीतसँगै अर्जेन्टिना लगातार दोस्रो पटक विश्वकप जित्ने दाउमा रहेको छ ।
अर्जेन्टिना सातौं पटक विश्वकपको सेमिफाइनलमा पुगेको हो । अब अर्जेन्टिनाले फाइनल प्रवेशका लागि इंग्ल्यान्डसँग खेल्नेछ । तीन पटकको विश्वविजेता अर्जेन्टिना तीन पटक नै उपविजेता बनेको छ ।
