खोर्सानेः मोरङको सुन्दरहरैँचा नगरपालिका १० स्थित सुकुना खेलमैदानमा हिजो भएको “प्रथम अन्तर्राष्ट्रिय सुन्दरहरैँचा खोर्साने गोल्डकप फुटबल प्रतियोगिता–२०८३” को उपाधि सहलेश फुटबल क्लब, सिराहाले जितेको छ ।
फाइनल खेलमा सहलेश फुटबल क्लबले धरान आरसी फुटबल क्लबलाई २–१ गोल अन्तरले पराजित गरेको हो ।
उपाधि विजेता सहलेश फुटबल क्लबले नगद २ लाख रुपैयाँसहित ट्रफी र मेडल प्राप्त गरेको छ । उपविजेता बनेको धरान आरसी फुटबल क्लबले नगद १ लाखसहित ट्रफी र मेडल प्राप्त गरेको आयोजकले जनाएको छ ।
विजेता टोली तथा खेलाडीलाई प्रमुख अतिथि नगरप्रमुख केदारप्रसाद गुरागाईंले पुरस्कार वितरण गर्नुभएको थियो । प्रतियोगितामा विभिन्न विधाका खेलाडीलाई व्यक्तिगत पुरस्कार पनि वितरण गरिएको थियो ।
वर्षा र विवादका कारण केही बेर खेल स्थगित भएपछि दोस्रो हाफको खेलमा १२ मिनेट समय थपिएको थियो । प्रतियोगितामा दुई जना खेलाडीले रातो तथा दुई जना खेलाडीले पहेँलो कार्ड पाएका थिए ।
