विराटचोकः नेकपा एमालले हिजो आयोजना गरेको ३३ औँ मदन आश्रित स्मृति सभामा पूर्व राष्ट्रपति विद्यादेवी भण्डारी प्रमुख अतिथि बन्नुभएको छ । भण्डारीले राजनीतिक सक्रियता बढाएपछि गत साउनमा भएको केन्द्रीय समितिको बैठकले भण्डारीको साधारण सदस्यता खोसेको (रद्द गरेको) थियो ।
एमालेले बल्खुको पुरानो कार्यालय रहेको खण्डहर स्थानमा आयोजना गरेको स्मृति सभामा पूर्वराष्ट्रपति भण्डारी प्रमुख अतिथि बन्नुभएको हो । भण्डारीलाई प्रमुख अतिथि बनाउने निर्णय ओलीकै चाहना अनुसार भएको बताइएको छ । पत्थरी र हर्नियाको शल्यक्रिया गरेर हाल स्वास्थ्य लाभ गरिरहेका ओलीले कार्यक्रममा आफू उपस्थित नहुने बरू विद्या भण्डारीलाई प्रमुख अतिथि बनाउनू भनी सुझाव दिएको बताइएको छ ।
सदस्यता समेत खोसिएकी भण्डारी एमाले कार्यक्रमको प्रमुख अतिथि बन्नुमा ओलीको स्वास्थ्य मात्र कारण छ कि राजनीतिक सन्देश पनि मिसिएको छ भनेर चासोको विषय बनेको छ । ओलीले बाध्यतावश भण्डारीसँग नजिकिएर सम्बन्ध सुधारको प्रयास थालेको हुन सक्ने अनुमान पनि गरिएको छ ।
