विराटचोकः आज देशका मध्य र पूर्वी क्षेत्रलगायतका स्थानमा वर्षा, हिमपात र आँधीहुरीको सम्भावना रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ ।
भारतको गोरखपुर–बगाहा हुँदै नेपाल प्रवेश गरिरहेको वर्षा गराउने प्रणाली नेपालमा पहिलेदेखि सक्रिय रहेको वर्षा गराउने प्रणालीसँग ठोक्किने भएकाले चितवनको भण्डारा, टाँडी, भरतपुर, मुग्लिङ र शक्तिखोर क्षेत्रमा ठूलो वर्षा हुने अनुमान गरिएको छ ।
धादिङ र उत्तरी मकवानपुर हुँदै यो प्रणाली बिहान १० देखि ११ बजेको आसपासमा काठमाडौं उपत्यका प्रवेश गरेर बढीमा ३ घण्टा वर्षा गराउने भए पनि उपत्यकामा ठूलो वर्षाको सम्भावना भने कम रहेको विभागले जनाएको छ ।
हाल नेपालमा पश्चिमी न्यून चापीय प्रणाली र स्थानीय वायुको प्रभावका कारण वर्षा भइरहेको छ । विभागका अनुसार मधेश, बागमती, गण्डकी, लुम्बिनी, कर्णाली र सुदुरपश्चिम प्रदेशलगायत बाँकी पहाडी र हिमाली भू–भागमा अहिले अधिकांश स्थानमा बादल लागेको छ ।
बागमती र गण्डकी प्रदेशका केही स्थानहरूमा बाँकी प्रदेशका थोरै स्थानहरूमा मेघगर्जन र चट्याङ्गसहित मध्यमसम्मको वर्षा र हिमपात सम्भावना रहेको छ । आज दिउँसो देशभर अधिकांश स्थानमा बादल लाग्ने विभागले जनाएको छ ।
महाशाखाका अनुसार कोशी, मधेश, बागमती र गण्डकी प्रदेशका धेरै स्थानहरू तथा लुम्बिनी, कर्णाली र सुदुर पश्चिम प्रदेशको केही स्थानहरूमा मेघगर्जन र चट्याङ्गसहित असिना तथा हावाहुरीसहित मध्यम वर्षा र हिमपातको सम्भावना छ ।
राति देशभर साधारणतया बादल लाग्ने महाशाखाले जनाएको छ ।
कोशी प्रदेश लगायत बाँकी प्रदेशको हिमाली भू–भागका थोरै स्थानहरुमा तथा बाँकी पहाडी भू–भागका एक–दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना रहेको महाशाखाले जनाएको छ ।
गत २४ घण्टामा सबैभन्दा धेरै वर्षा मोरङको लेटाङमा भएको छ । पछिल्लो एक घण्टामा भने सबैभन्दा धेरै वर्षा पाल्पामा भएको छ ।
