काठमाडौंः पारिजात स्मृति केन्द्रले पारिजात सम्मानबाट सम्मानित हुने प्रतिभाको नाम घोषणा गरेको छ । साहित्यकार पारिजातको ९२ औँ जन्मजयन्तीका अवसरमा शनिबार काठमाडौंमा आयोजना गरिएको ‘पारिजात जन्मजयन्ती’ कार्यक्रममा सम्मानित हुनेहरूको नाम घोषणा गरिएको हो ।
केन्द्रका महासचिव दिलसुन्दर श्रेठले आगामी वैशाख ५ गते पारिजातको स्मृति दिवसमा सम्मान प्रदान गरिने बताए ।
सम्मानित हुनेमा ‘पारिजात बालसाहित्य सम्मान २०८२’ बाट साहित्यकार रामबाबु सुवेदी, ‘पारिजात कला सम्मान २०८२’ बाट गीतकार तथा सङ्गीतकार शरद पौडेल, ‘पारिजात सृजन सम्मान २०८२’ बाट नवीन विभास तथा ‘पारिजात सङ्घर्षशील महिला सम्मान २०८२’ बाट देवी खड्का रहेकी छिन् ।
३० फागुन १९९० मा पारिजातको जन्म भएको दिनलाई प्रत्येक वर्ष केन्द्रले ‘पारिजात जन्मजयन्ती’का रूपमा मनाउँदै आएको छ ।
यसैगरी, केन्द्रले पारिजात परिसंवाद कार्यक्रम गर्दै आएको छ । यस वर्ष ‘प्राडा वासुदेव त्रिपाठीसँग डा. महेश मास्के पारिजात परिसंवाद’ कार्यक्रम सञ्चालन गरेको थियो ।
