विराटचोकः नेपाली शेयर बजारमा सोमबार एउटा संयोग देखिएको छ । २६.०५ अंकले घटेर २६७२.३९ अङ्कमा रोकिएको शेयर बजारमा उच्च मूल्य घट्ने र उच्च मूल्य बढ्ने कम्पनीमा जलविद्युत समूहका कम्पनी परेका छन् । त्यतिमात्रै होइन धेरै रकम कारोबार गर्ने, धेरै पटक कारोबार हुने र धेरै कित्ता कारोबार हुने अधिकांश कम्पनी पनि जलविद्युत समूहकै छन् ।
खानीखोला हाइड्रोपावर र रिडी पावरको शेयरमूल्य १० प्रतिशत हाराहारीमा बढ्दा लिबर्टी इनर्जी, नेसनल हाइड्रोपावर, त्रिशुली जलविद्युत कम्पनी, हिमालयन ऊर्जा विकास कम्पनीलगायतका जलविद्युत समूहका कम्पनीहरु उच्च मूल्य बढ्ने कम्पनीमा परे । उच्च मूल्य बढ्ने १० कम्पनीमध्ये दुई वटा सामुहिक लगानी कोष समूहका कम्पनी छन् भने बाँकी ८ वटा जलविद्युत समूहका छन् ।
उता, धेरै शेयर मूल्य घट्ने कम्पनीमा पनि हाइड्रोपावर समूहकै कम्पनीहरु परे । सोमबार सबैभन्दा धेरै मायाखोला हाइड्रोपावर ५.४० प्रतिशतले घट्यो । माबिलुङ इनर्जी ४.९३ प्रतिशतले घट्यो । त्यस्तै सुपरमाई हाइड्रोपावर ४.४८ प्रतिशत र हिमस्टार ऊर्जा ४.२० प्रतिशतले घटन पुगे । टप गेनर १० कम्पनीमध्ये ८ वटा, टप लुजरका १० मध्ये ४ वटा हाइड्रोपावर समूहकै कम्पनी परे । त्यस्तै टप टर्नओभरको शीर्ष १० मध्ये ९ वटा, टप भोल्युम र टप ट्रान्जेक्सनको शीर्ष १० मध्ये ८ वटा कम्पनी पनि हाइड्रोपावर समूहकै परेका छन् ।
