बेलबारीः मोरङको बेलबारीबाट हप्ता दिन अघि रातारात सुनसरीको इनरुवा सारिएको कोशी प्रदेश प्रहरी अस्पताल बेलबारीमै फर्काउन नेपाल प्रहरीका प्रहरी महानिरीक्षक वसन्त कुँवर सकारात्मक देखिएका छन् ।
बेलबारीका जनप्रतिनिधि, प्रदेश सभा सदस्यसहित स्थानीय राजनीतिक दलका नेताहरुको टोलीले महानिरीक्षक कुवँरसँग भेट गरी प्रहरी अस्पताल फर्काउन आग्रह गरेका थिए । भेटमा कुँवर उक्त अस्पताल बेलबारीमै सञ्चालन गर्न सकारात्मक देखिएका थिए ।
अस्पतालका लागि २ आवश्यक पर्ने २ बिघा जग्गा प्रदेश सांसद ज्ञानेन्द्र सुवेदीले उपलब्ध भएका छन् । पुस १० गते प्रहरीले जग्गा हेर्न टोली पठाउने भएको छ ।
नगरपालिकाले दिएको जग्गामा अस्पताल नबनेसम्म बेलबारी ४ मा निर्माणाधीन अवस्थामा रहेको २५ शैय्याको नगर अस्पताल नगरपालिकाले प्रहरी अस्पतालका लागि उपलब्ध गराउने सहमति समेत गरेको छ । २ महिनामा सो भवन निर्माण भइसक्ने बताइएको छ ।
प्रदेश प्रहरी अस्पताललाई बेलबारीमै पुनः स्थापना गर्नुपर्ने माग गर्दै आइतबार जनप्रतिनिधि तथा स्थानीय राजनीतिक दलका नेताहरु काठमाडौं पुगेर प्रधानमन्त्री पुष्पकमल दाहाल (प्रचण्ड) लाई भेटेका थिए । बेलबारीबाट कोशी प्रदेश प्रहरी अस्पताल रातारात सुनसरीको इनरुवामा सारिएपछि जनप्रतिनिधि तथा स्थानीय राजनीतिक दलहरूले विरोध गर्दै आएका छन् ।
मोरङ क्षेत्र नम्बर ३ का सांसद सुनिल शर्मा, प्रदेश सांसदहरु ज्ञानेन्द्र सुवेदी, मानबहादुर लिम्बू र गीता तिम्सिना, बेलबारीका मेयर दिलप्रसाद राई (डिपि), उपमेयर नितु थापा कोइरालालगायतका जनप्रतिनिधिहरूले प्रहरी महानिरीक्षक कुँवरलाई भेटेका थिए ।
