काठमाडौंः कालिका कन्स्ट्रक्सनका सञ्चालक एवम् राष्ट्रिय प्रजातन्त्र पार्टी (राप्रपा) का नेता पूर्वमन्त्री विक्रम पाण्डे पक्राउ परेका छन् ।
प्रहरीको केन्द्रीय अनुसन्धान ब्युरो (सीआईबी)को टोलीले पाण्डेलाई पक्राउ गरेको हो । सार्वजनिक खरिद प्रणाली ह्याक गरेर ठेक्का आफ्नो कम्पनीलाई पारेको कसुरमा उनलाई पक्राउ गरिएको प्रहरीले जनाएको छ ।
सिक्टा सिँचाइ आयोजनामा भ्रष्टाचार गरेको कसुरमा पाण्डेविरुद्ध अख्तियार दुरुपयोग अनुसन्धान आयोगले २०७५ मा मुद्दा दायर गरेको थियो ।
सो मुद्दामा उनी ४ करोड रुपैयाँ धरौटी बुझाएर छुटेका थिए ।
पाण्डे २०७९ सालको प्रतिनिधि सभा निर्वाचनमा चितवन क्षेत्र नम्बर ३ बाट राप्रपाको तर्फबाट उम्मेद्वार भएर विजयी भएका थिए ।
